გოგა ბითაძის „ორლანდო მეჯიქი“ „ბოსტონ სელტიქსთან“ დაძაბულ ბრძოლაში დამარცხდა. ფლორიდელებმა მეტოქეს უმასპინძლეს, თუმცა საბოლოოდ 107:111 დათმეს.

შეხვედრა უკიდურესად დაძაბული გამოდგა. მატჩის დასრულებამდე 1 წუთით ადრე, „ორლანდო“ მხოლოდ 1 ქულას აგებდა, თუმცა „ბოსტონის“ მოთამაშეების, დერიკ უაითისა და ჯორდან უოლშის, მიერ ჩაგდებულმა სამქულიანებმა თამაშის ბედი საბოლოოდ გადაწყვიტეს.

ბითაძის შთამბეჭდავი დაცვა

ქართველმა ცენტრმა მატჩი სათადარიგოთა სკამზე დაიწყო და პარკეტზე 14 წუთი და 53 წამი გაატარა. მიუხედავად იმისა, რომ გოგამ შეტევაში მხოლოდ 2 ქულა (2-დან 1 ორქულიანი) და 1 შედეგიანი გადაცემა მიითვალა, მან დაცვაში ბრწყინვალე მატჩი ჩაატარა.

ბითაძის ანგარიშზეა 3 შთამბეჭდავი დაფარება, 2 მოხსნა და 1 ჩაჭრა. მან ასევე 4 პერსონალური ფოლი მიიღო.

გუნდების ლიდერები

„ორლანდოს“ რიგებში საუკეთესო კვლავ პაოლო ბანკერო იყო 28 ქულითა და 5 მოხსნით. მას მხარი აუბეს ფრანც ვაგნერმა და ჯეილენ საგსმა, რომლებმაც 20-20 ქულა დააგროვეს.

„ბოსტონის“ მხრიდან 27 ქულით ჯეილენ ბრაუნი გამოირჩა, ხოლო დერიკ უაითის ანგარიშზე 21 ქულა იყო.