თორნიკე შენგელიამ „ბარსელონას“ კიდევ ერთ დაძაბულ საღამოში მნიშვნელოვანი დახმარება გაუწია.

ლიგა ენდესას შეხვედრაში კატალონიურმა გუნდმა „მორაბანკ ანდორა“ სტუმრად 100:95 დაამარცხა. მატჩი ძირითად დროში ვერ გადაწყდა, ოვერტაიმში კი „ბარსამ“ უფრო მშვიდად და ზუსტად ითამაშა და გადამწყვეტი მონაკვეთი 14:9 მოიგო.

ქართველმა ფორვარდმა პარკეტზე 33 წუთი გაატარა და გუნდს 15 ქულა, 7 მოხსნა და 1 შედეგიანი გადაცემა შესძინა. თოკომ ორქულიანებში 7-დან 5 ჩააგდო, საჯარიმოს ხაზიდან კი 6-დან 5 მცდელობა გამოიყენა.

შენგელიას როლი განსაკუთრებით მაშინ გამოჩნდა, როცა თამაშმა ფიზიკური ბრძოლა და გამოცდილება მოითხოვა. ასეთ მომენტებში „ბარსელონასთვის“ მისი სიმშვიდე და ძალა კვლავ მნიშვნელოვანი იარაღია.

კატალონიურ კლუბს 24 მოგება და 9 მარცხი აქვს, პლეი-ოფში ადგილი უკვე განაღდებული აქვს და რეგულარული სეზონის ბოლო ტურში „ვალენსიას“ შეხვდება.